1912an inauguratu zuen Maria Cristina erreginak. Estatuan eraiki zen hirugarren funikularra izan zen eta lehendabizikoa Kataluniatik kanpo. Hasiera batean zabalik zeuden ibilgailu biak, baina gaur egun egur eta beirarekin itxita daude. Bakoitzak bost konpartimentu ditu eta 50 eserleku, egunero 6.000 lagun eramateko ahalmena dutela, nahiz eta gutxi gorabehera 2.000 eramaten dituzten.

Hiru minutuko bidaian Ondarretako hondartza ingurua Igeldo mendiarekin eta bertako jolas-parkearekin lotzen du. Bertatik hiriaren ikuspegi ederra dago. Aparkaleku txikia dago funikularraren ondoan, autoa utzi eta funikularra hartzeko.